നാം 23 - നമ്പൂതിരി മഹാസംഗമം

26 02 23

നാം ട്വന്റിത്രീ നടപ്പു, ബ്രാഹ്മണസമൂഹത്തിൻ മഹാസംഗമം
എത്തീടേണമതിന്നുവേണ്ടിയതിയുത്സാഹത്തോടേയേവരും
വട്ടം കൂടിയിരുന്നു നാട്ടിലെ വിശേഷങ്ങൾ പറഞ്ഞൂറ്റമായ്‌
നാലും കൂട്ടി മുറുക്കി വണ്ടി കയറാൻ നോക്കേണ്ട, സാധിക്കൊലാ.
  
നമ്പൂരാർക്കു വിധിച്ച കാര്യമഖിലം ചർച്ചക്കു വന്നീടുമേ
പെമ്പിള്ളേർക്കു വരൻ, വരന്നു വധുവും കിട്ടാത്തതെന്താകുമോ?
വ്യാപാരത്തിനിറങ്ങുവാൻ മടി, യതും തങ്ങൾക്കു പറ്റില്ലയോ?
പൂജാ, തന്ത്ര, മിതമ്പലം, സകലതും ചർച്ചക്കു പൊന്തിച്ചിടാം.*
  
പോരാ, മത്സരമേറെയുണ്ടു കുസൃതിക്കുഞ്ഞുങ്ങൾ തൻ പുഞ്ചിരി,
കൈകൊട്ടിക്കളി, പാ, ട്ടതും പലവിധം, നൃത്തം, പ്രസംഗം, പടം,
ഡബ്സ്മാഷുണ്ടു, കുടുംബസെൽഫി, കവിതാപാരായണം, ശ്ലോകവും,
പെയിന്റിംഗ്, എന്തിനി,യോതിടേണ്ടു, സഖരേ, യാദ്ധ്യാത്മികഭാഷണം.*
 
 മെയ് പത്തോടൊരു മൂന്നു കൂട്ടുക, ശനീ നാളിൽ കരേറും കൊടി-
പ്പിറ്റേന്നാൾ, പതിനാലിനത്രെ കൊടിയെത്താഴേയ്ക്കിറക്കുന്നതും 
നെല്യക്കാട്ടു ഹരീ, ഭവാൻറെ പ്രതിഭാശക്തിക്കു കൂപ്പുന്നു ഞാൻ
സന്തോഷിന്നുടെ നേതൃപാടവമതിൻ മുമ്പിൽ നമിപ്പേനഹം.
  
കാസർക്കോടു മുതൽക്കു കേരളതലസ്ഥാനം വരേയ്ക്കുള്ള ന-
മ്പൂരാരൊത്തൊരുമിച്ചു കൂടുമതിലേക്കെത്തേണമെല്ലാവരും
“നാം ട്വന്റീത്രീ ചമച്ചിടും ചരിതമീ രാമൻറെ പൊൻനാട്ടി”ലെ-
ന്നൂറ്റത്തോടെ പറഞ്ഞിടൂ സഹജരേ, "ഞാൻ പോയിടു"ന്നെന്നതും!
  
എല്ലാം നന്നായ് നടക്കാ, നരിതരമധുരം നാവിൽ മായാതിരിക്കാൻ,
എന്നെന്നും മാനസത്തിൽ സ്മരണകളുണരാ, നോർത്തു സംതൃപ്തരാകാൻ
നെല്ല്യക്കാട്ടമ്മ, ദേവീ, തവ മൃദുഹസിതാൽ, ചഞ്ചലാക്ഷക്കടാക്ഷാൽ,
നിൻ പാദം കുമ്പിടുന്നിത്തനുജരെ, വരദേ, കാത്തുരക്ഷിക്ക തായേ!
 
---------
* ഇത് ശ്ലോകകർത്താവിൻറെ ഭാവനയാണ്. പരിപാടികളുടെ വിശദവിവരം അറിയാൻ ഭാരവാഹികളുമായി ബന്ധപ്പെടുക!